| De Bahr Evi, ihr kennt’sas fo de Wuchtln her, Intarressiat si neuadings recht sehr Fias Saffmsiadn noch klassischa Oat, Weu ma si do mit da Zeit a Menge daschboat. |
 |
| Damit owa ned glei a Bledsinn passiat Hods fia zwa Tog den Herrn Gessinger aungaschiat. Der ihr ollas zagt, gaunz pennibel genau, Wos beim Siadn ollas gmocht gheat und tau. |
|
| Da Herr Gessinger, des muaß i erklärn, Tuat zu de öhtan Joahgäng scho ghean Und des Saffmsiadn is seit Generationen schon In seina Familie beinoh Tradition. |
|
| Weu a poa Augn meah, a bissl meahra no sehng, Wia ah a poa Uahn meah, meah zum Hean jo famehng, Und mit Freind des goa an Schbaß ah no mocht, So hod si unsare Evi docht: I lod de Nochbarin und de Claudia midn Dieter ein, S’wiad sicha schee und lustig sein. |
 |
| Aun an Dunnastog, so gehng ocht, fiadl nein, Treffm mia daunn oiso bei da Evi ein. Da Herr Gessinger woa scho zum Siadn bereit, Doch fia an Gschbrizdn woa oimoi no Zeit. |
|
| Ois easchds wiad a Öhgemisch auf fümfafiazig
Grade brocht, Und während ma no mit ahn Aug auf de Fettn ocht, Wiad in an Wossabohd de Lauge aungmocht. |
|
| A Plastik- oda a Nirosta-Gschia Eignet si do aum bestn dafia. Weu gibt ma de Lauge woaundas nei, So wiad da Topf schnöh lukad sei. |
 |
| Ins ohgwohgne Wossa wiad a Ätznatron neigriaht, Fuasichtich, damit den Aung nix passiat. Des Gmisch wiad hahß, faungt zum Daumpfn au, Jetzt schnöh, wengan Gschdaunk, de Fensta auftau. |
|
| Is Wossabod tuat de Lauge kühn Befua ma’s tuat zua Fettn fühn. Und damit si de zwa Saftln ah recht gscheid fabindn, Tuat ma an Mixa auf schwächsta Stufm fawendn. |
 |
| Wichtich is, dass ma ka Luft ned dawischt, Die si fileicht duachs Mixn einimischt. Weu daunn schauat de Sahf so aus ois wahs Wia ausn Emmentoi da Kahs. |
 |
| Und kau wer mit da Safmoriginalfoab ned lehm, Der kau fo da Kosmetik jetzt a Foab einegehm. Nimmt daunn des Gaunze a Puddingform au, Wiad zguadaletzt de Nochfettung no einetau. |
|
| A guade Nochfettung bewiakt auf da Haut, Dass’ nochn Woschn wia erhoid ausschaut. Und gibt ma goa no a wengal an Duft dazua, So kriagt ma boid fom Woschn ned gnua. |
 |
| Und weu ahn des meist schlecht gelingt, Dass ma a feste Sahf aus an Topf aussabringt, So füht ma aum bestn de Masse wo nei, Wo ma recht leicht olle sechs Seitn kriagt frei. |
|
| A Mühch- oda a Fruchtsoftpackl eignet si do
guad, Weu wauma togsdrauf de Hülle weg tuat, Kau ma mit ana Eisnsohg, Scheibm fia Scheihm, De Sahfmschdickln owaschneihn. |
 |
| Und ahn Tog drauf kaunnst de Saff scho fawendn, Womit endlich ah mei Safmsiadagedicht tuat endn. |
 |
| Füh Glick, füh Schbass und a guades Gelingen - Ob und zu kennts ma jo a Schdickl bringen! |
|
| von Dieter Friedl 11., 17. & 31. August & 2. September 2007 |